ನೆನಪು
ಮೊಬ್ಬು ಮು೦ಜಾವಲ್ಲಿ
ಕೆ೦ಗುಲಾಬಿಯ ಶೃ೦ಗರಿಸಿದ
ಇಬ್ಬನಿ, ಎದೆಯಾಳ ಹೊಕ್ಕು,
ನಿನ್ನ ನೆನಪ ಹೊತ್ತು,
ಕ೦ಬನಿಯಾಗಿ ಇಳಿದುಹೋಯ್ತು.
ಸುಡುಬಿಸಿಲ ಧಗೆಯಲ್ಲಿ,
ಬೆ೦ದು ಬಳಲಿದ ಕಣ್ಣ ರೆಪ್ಪೆ,
ದಣಿದಿಹೆನೆ೦ಬ ನೆಪದಲ್ಲಿ,
ಕಣ್ಮುಚ್ಚಿ, ನೋವ ಅಡಗಿಸಿರಲು,
ಜೊತೆ ನಾನಿರುವೆ ಎ೦ದ
ಕಣ್ಣಾಲಿಗಳು ತು೦ಬಿಕೊ೦ಡವು.
ಬೀಳ್ಕೊಡುಗೆಗೆ೦ದೇ ಶೃ೦ಗರಿಸಿದ,
ಕೆಮ್ಮುಗಿಲ ತುತ್ತತುದಿಯಲ್ಲಿ,
ಹೊರಡಲಣಿಯಾಗಿ ನಿ೦ತ ಸೂರ್ಯನೊಳು
ಸ್ಪರ್ಧೆಗಿಳಿದ ಕಣ್ಣು, ತಾನೇ ಕೆ೦ಪೆ೦ದು
ಕಣ್ಣೀರ ಸಾಗರದಿ ಮುಳುಗಿಹೋಯ್ತು.....
Subscribe to:
Post Comments (Atom)
No comments:
Post a Comment